مفاجأة ............ مقالات مهمة لاولى اتصالات كون ورشتك بنفسك

الموضوع دة انا عملتة مخصوص لزمايلى فى اولى اتصالات ودة باعتبار ان اخوانا اللى اكبر منا اكيد عندهم فكرة ودة طبعا ميمنعش انهم يستفيدوا منه

الورشةشىء مهم جداً لانك لو كنت معتقد انك يوم ما هاتتخرج هتشتغل فأحب ابشرك - انت بتحلم - انا مبحطمكش ولكن لازم تعرف ان المهندس زيه زى الفنى كل الاختلاف انك عندك شوية معلومات زيادة عنه علشان كدة انت لازم تكون بتعرف تعمل اى حاجة يعملها الفنى علشان كدة لازم يكون مستواك الفنى - شغل ايدك يعنى - زى الفل واحسن من مستوى اى فنى هيكون تحت ايدك طبعا انا لا اقلل من مستوى الفنى ولكن هى الحياة كدة الفنى بيكون معتقد انك فاهم كل حاجة فى الدنيا فلازم تحسسوا انك على الاقل فى نفس مستواة الفنى يعنى لازم يكون عندك شوية مهارات تعامل على رأى د/خالد صبحي المهم لو جينا نتكلم على الورشة فاول حاجة نفكر فيها هى المكان و احب اقولك ياهندسة مفيش اى مشاكل ممكن تكون ورشتك طرابيزة فى غرفتك يعنى المكان مش مشكلة بالمرة اهم حاجة تراعيها فى الورشة التهوية والأضاءة الكويسة وحاول لن الارضية تكون بلاط يعنى لو فيه اى فرش فى الارض زى السجاد او الموكيت ابعده وحاول يكون عندك اى طفاية حريق او جردل رمل اهو حاجة تقدر تطفى بيها اى حريق لا قدر الله لازم تراعى عدم وجود اى مواد قابلة للاشتعال زى الورق او اى سائل - تنر مثلاً - على تزجة الشغل وطبعا كلنا عارفين يعنى اية تزجة - واللى مش عارف يسال د/ مصطفى المهندس - فلازم تكون فاضية تماما الا من عدتك طبعا ............

[ودلوقتى هنتكلم عن احتياطات الامن والسلامة فى الورشةاول كلامنا عن الامن والسلامة لازم تعرف وانت شغال انك بتشتغل مع الكهربا طبعا انت فهمت خطورة شغلك لذلك فتعليمات الامن دى لازم تكون عارفها زى اسمك ونبتدى بسم الله
1- التركيز وانت شغال اهم ما يمكن فحاول متتكلمش مع حد او تشغل نفسك باى حاجة إلا الشغل وبس... ممكن تسمع شوية موسيقى او قران اهو حاجة تريح اعصابك والسلام

2- راعى عدم العمل وانت حافي علشان متتكهربش لذلك لازم تلبس حاجة تعزل ويكون الكرسي بتاعك خشب او بلاستيك وكمان الارضية متكونش فيها مية مرطبة يعنى

3- لازم التزجة بتاعتك تكون مترتبة

4- خد بالك وانت شغال بالكاوية وطبعا متنساش قاعدة الكاوية لانها مهمة و لازم يكون عندك شوية مضادات حروق لزوم الحوادث لاقدر الله

5- فيه نوع مقاومات اسم مقاومات حرارية ودى بتسخن لما بتشتغل لازم تعرف شكلها كويس لانها ممكن تعرضك للحروق

6- اكتب ملاحظاتك لو حبيت تفك جهاز لان دة اكيد هيفيدك

7- لو اضطريت تسيب الشغل لاي ظرف طارئ لازم تقفل شغلك ومتسبهوش مترمى فى كل حتة ولو حسيت باى تعب انهى عملك فوراااً

8- في بعض الاجهزة فيها مكثفات فولتها عالى جدا خالى بالك منها ودى هتلاقيها فى التليفزيون واجهزة الميكروويف المكثفات دى فيها كهربا ممكن تنور شارع كامل ممكن تتخلص من الخطر دة بتفريغ الشحنة من المكثف بتوصيل اطلاافه بالارضي

9- تنظيم شغلك مهم جداً فلازم تحافظ على على مكان شغلك منظم مرتب هادى وبلاش الزحمة

10- العدة مهمة جدا لذلك لازم تحافظ عليها زى عينيك وخاصة الكاوية

11- راجع شغلك كويس لتجنب الأخطاء و بعد من تخلص شغلك افصل كل العدة من الكهربا

12- بالنسبة للبنات الشعر لازم يكون مربوط و ابعدى الدهب من سلاسل او خواتم لانهم بيوصلوا التيار ............ يعنى حاولى تحافظى على نفسك من الخطر

13- عند القياس حاول تستخدم ايد واحدة فى القياس والتانية تكون معزولة

وبكدة نكون انتهينا من اول خطوات انشاء الورشة ............................تعليمات الامن

________________________________________________________
Sayco